11.03.2025 - Sveitarstjórn Húnabyggðar

2502003F

• 1.1 2502010 Slit byggðasamlaga Húnabyggðar og Skagastrandar
  Byggðarráð Húnabyggðar - 95 Lögð var fram stöðuskýrsla KPMG um slit byggðarsamlaga um; atvinnu- og menningarmál, tónlistarskóla og félags- og skólaþjónustu.
  Vinna við slit byggðarsamlaganna er í fullum gangi og gengur mjög vel. Frá áramótum tók Húnabyggð yfir byggðarsamlag um menningar- og atvinnumál sem m.a. hafði með starfsemi héraðsskjalasafnsins að gera. Frá áramótum tók Sveitarfélagið Skagaströnd við rekstri tónlistarskólans og mun Húnabyggð í framhaldinu kaupa þá þjónustu af Sveitarfélaginu Skagaströnd. Flóknustu slitin eru slitin á félags- og skólaþjónustunni en samningsdrög sveitarfélaganna um þjónustu í þeim málaflokki hafa verið send inn til ráðuneytisins. Reiknað er með að Húnabyggð taki yfir þá þjónustu á vormánuðum. Samhliða þessum slitum eru sveitarfélögin að nota tækifærið og semja sín á milli um ýmiskonar þjónustu. Verkefnið er í heild sinni töluvert flókið og mikið af smáatriðum sem þarf að finna út úr, töluvert safn eigna fylgir þessu og ýmiskonar skyldur og þátttaka í samstarfi utan svæðisins.
  
• 1.2 2502011 Málefni slökkviliðs Húnabyggðar
  Byggðarráð Húnabyggðar - 95 Farið var yfir ýmis mál slökkviliðs Húnabyggðar og brunavarnir í Húnabyggð. Töluverð fjárfestingarþörf er hjá slökkviliðinu bæði hvað varðar tækjabúnað, húsnæði o.fl. Brunavarnir í fasteignum sveitarfélagsins er stórt verkefni sem unnið hefur verið í síðastliðin ár og halda þarf áfram með. Ákveðið hefur verið að KPMG geri úttekt á slökkviliðinu nú eftir að það er deild innan Húnabyggðar en ekki í byggðarsamlagi. KPMG mun einnig leiða ásamt slökkviliðsstjórum samtal milli slökkviliðs Húnabyggðar og Skagastrandar hvað varðar framtíðar samstarf.
• 1.3 2502013 Umsagnarbeiðni vegna máls nr. 01892023 í Skipulagsgátt
  Byggðarráð Húnabyggðar - 95 Byggðarráð felur sveitarstjóra að senda inn umsögn Húnabyggðar vegna þessa máls sem snýr að lagningu Holtavörðuheiðarlínu 3. Eins og fram hefur komið í bókunum byggðarráðs og sveitarstjórnar Húnabyggðar hefur Húnabyggð lagt á það áherslu að skoðað verði alvarlega að leggja þessa línu með núverandi byggðarlínu þar sem það er eina raunhæfa leiðin til að tryggja framtíðar aðgengi að orku til atvinnuuppbyggingar fyrir Norðurland vestra. Þetta er því grundvallar byggðarforsenda framtíðarinnar hvað varðar Húnabyggð, Sveitarfélaginu Skagaströnd og Húnaþing vestra. Þá muni sú lausn einnig opna fyrir hringtengingu til Sauðárskróks og þannig tryggja orkuöryggi til atvinnuuppbyggingar í Skagafirði til framtíðar.
• 1.4 2501037 Byggðakvóti
  Byggðarráð Húnabyggðar - 95 Lagt fram til kynningar. Byggðarráð felur sveitarstjóra að senda sérreglur um byggðakvóta til Matvælaráðuneytisins. Bókun fundar Sveitarstjórn staðfestir sérreglur um byggðarkvóta Húnabyggðar.
• 1.5 2212008 Húnabyggð - Samþykktir
  Byggðarráð Húnabyggðar - 95 Sveitarstjóra falið að fara yfir samþykktir Húnabyggðar og koma með tillögur að uppfærslu þeirra í takt við breytingar sem orðið hafa á kjörtímabilinu og samkvæmt þeim umræðum sem voru á fundinum. Skoða þarf hvernig einfalda megi stjórnsýslu Húnabyggðar hvað varðar störf nefnda og almennt verklag í samskiptum stjórnsýslunnar. Þá þarf að skoða leiðir til að minnka kostnað við stjórnsýsluna.
• 1.6 2502012 Skilagrein 2024 vegna Skagabyggðar
  Byggðarráð Húnabyggðar - 95 Lagt fram til kynningar.
• 1.7 2502014 Fundargerð 118. fundar stjórnar SSNV
  Byggðarráð Húnabyggðar - 95 Lagt fram til kynningar.
• 1.8 2502015 Fundur samstarfsnefndar lögreglu og sveitarfélaga í umdæmi lögreglustjórans á Norðurlandi vestra
  Byggðarráð Húnabyggðar - 95 Lagt fram til kynningar.
• 1.9 2502016 Bréf frá tilnefningarnefnd Lánasjóðs íslenskra sveitarfélaga
  Byggðarráð Húnabyggðar - 95 Lagt fram til kynningar.
• 1.10 2502017 Fundargerð 963. fundar stjórnar Sambands íslenskra sveitarfélaga
  Byggðarráð Húnabyggðar - 95 Lagt fram til kynningar.
• 1.11 2502018 Dómur félagsdóms vegna kennaraverkfalla
  Byggðarráð Húnabyggðar - 95 Lagt fram til kynningar.
• 1.12 2502019 Áform um breytingar á sveitarstjórnarlögum - mat á fjárhagslegum áhrifum frumvarpsins
  Byggðarráð Húnabyggðar - 95 Lagt fram til kynningar.
• 1.13 2301007 Húnabyggð - Sala eigna
  Byggðarráð Húnabyggðar - 95 Byggðarráð samþykkir kauptilboð á eign sveitarfélagsins við Hnjúkabyggð 27 (íbúð 00 03 010403) upp á 22.000.000kr. og felur sveitarstjóra að ganga frá sölu eignarinnar.
  Bókun fundar Sveitarstjórn staðfestir sölu á eigninni Hnjúkabyggð 27 (íbúð 00 03 010403).

2502004F

• 2.1 2408023 Aðalskipulag sameinaðara þriggja sveitarfélaga
  Skipulags- og samgöngunefnd Húnabyggðar - 33 Farið var yfir drög af landnýtingarflokkum í þéttbýli og dreifbýli ásamt merkingum á gönguleiðum ofl.

2502006F

• 3.1 2502020 Fundargerð stjórnar Húnanets frá 30.01.2025
  Byggðarráð Húnabyggðar - 96 Fyrir fundinum lá fundargerð stjórnar Húnanets en miklar breytingar hafa orðið á rekstri félagsins sem hefur verið í járnum lengi. Aðhald í rekstri og gjaldskrárbreytingar hafa orðið til þess að laga reksturinn mikið og fyrirséð er að með frekari breytingum á gjaldskrám verði hægt að laga stöðuna enn betur. Þá er lagt til að Húnabyggð breyti skuldum félagsins í hlutafé til að létta á skuldum félagsins og var þeirri tillögu vísað til KPMG til frekari útfærslu.
• 3.2 2502021 Fundargerð stjórnarfundar Húnanets 19.02.2025
  Byggðarráð Húnabyggðar - 96 Sigurður Erlingsson mætti á fundinn undir þessum lið.
  
  Fyrir fundinum lá tillaga KPMG að breyta hreinum skuldum Húnanets við Húnabyggð upp á 20,5 milljónir í hlutafé. Tillagan borin upp og samþykkt samhljóða. Bókun fundar Sveitarstjórn staðfestir afgreiðslu byggðarráðs.
• 3.3 2502022 Umsögn um mál nr. 01892023 í Skipulagsgátt
  Byggðarráð Húnabyggðar - 96 Umsögn Húnabyggðar vegna umhverfismats Holtavörðuheiðarlínu 3 lagt fram til kynningar. Húnabyggð hefur lagt áherslu á að byggðarþróun sé gert hærra undir höfði í verkefninu og að hugað sé að framtíðar orkuaðgengi svæðisins alls við skipulagningu verkefnisins. Að mati Húnabyggðar er orkuöryggi Húnabyggðar, sveitarfélagsins Skagastrandar, Húnaþings vestra og Skagafjarðar og framtíðarhagsmunir byggðarþróunar svæðisins undir í þessu verkefni.
• 3.4 2502023 Þjónustusamningur við tónlistarskóla
  Byggðarráð Húnabyggðar - 96 Sveitarfélagið Skagaströnd hefur tekið við rekstri tónlistarskólans og drög að þjónustusamningi milli Húnabyggðar og sveitarfélagsins var lögð fram til kynningar og samningsdrögin samþykkt.
• 3.5 2502024 Skýrsla Skotfélagsins Markviss
  Byggðarráð Húnabyggðar - 96 Skýrsla Markviss lögð fram til kynningar og ákvörðun um nafngift á nýjum vegi í gegnum Kleifarnámu vísað til skipulags- og samgöngunefndar.
• 3.6 2502025 Samningur við Ós textílmiðstöð
  Byggðarráð Húnabyggðar - 96 Samningur byggðarsamlags um atvinnu- og menningarmál við Ós textílmiðstöð sem rennur út á árinu 2025 lagður fram til kynningar. Sveitarstjóra falið að ganga frá samningum vegna notkunar Ós textílmiðstöðvar og Textílmiðstöðvar Íslands á fasteignum sveitarfélagsins.
• 3.7 2502027 Uppgjör vegna málefna fatlaðs fólks á Norðurlandi vestra 2024
  Byggðarráð Húnabyggðar - 96 Lagt fram til kynningar
• 3.8 2502026 Endurskoðun fyrirkomulags eftirlitskerfis með hollustuháttum og mengunarvörnum og matvælum
  Byggðarráð Húnabyggðar - 96 Lagt fram til kynningar

2502007F

• 4.1 2502028 Ákvörðun Skipulagsstofnunar um matsskyldu í máli nr. 20241474
  Byggðarráð Húnabyggðar - 97 Húnabyggð fagnar því að nú styttist í framkvæmdir við vegagerð í Vatnsdal. Húnabyggð vill þó nota tækifærið og árétta að sveitarfélagið leggst alfarið gegn efnistöku í og/eða við Vatnsdalshóla og að sýna þurfi sérstaka varúð almennt við náttúruvætti eins t.d. Vatndalshóla og Kattarauga. Þá er einnig lögð áhersla á að efnistaka sé ekki framkvæmd nærri straumvatni og Vegagerðin þarf að skilgreina mótvægisaðgerðir vegna fornminja. Þá felur byggðarráð skipulagsfulltrúa að vera í samtali við Vegagerðina og Rarik vegna áhrifa framkvæmdanna á strengjalagnir á svæðinu.
• 4.2 2502029 Samþykktir Húnaborgar hses
  Byggðarráð Húnabyggðar - 97 Samþykktir Húnaborgar hses lagðar fyrir og samþykktar. Samþykkt að veita 1.000.000kr. í stofnfé fyrir félagið. Bókun fundar Sveitarstjórn samþykkir afgreiðlu byggðarráðs.
• 4.3 2502030 Endurgerð á Skjólinu
  Byggðarráð Húnabyggðar - 97 Fyrir fundinum lág kostnaðarsamantekt á endurgerð Skjólsins sem er félagsmiðstöð ungmenna í Húnabyggð. Miklar framkvæmdir voru þar á síðasta ári og fluttu ungmennin þar inn á haustmánuðum 2024. Öll efri hæð félagsheimilisins var tekin í gegn og endurbyggð nema að eftir á að skipta um glugga á vesturhlið hússins. Búin var til hlýleg og góð aðstaða fyrir ungmennin og lyfta sett í húsið til að tryggja aðgengi allra. Þá var þakið einangrað að utan og klætt. Heildarkostnaður allra þessara framkvæmda losuðu tæpar 56 milljónir.
• 4.4 2502031 Fundur sveitarstjóra með heimastjórn fyrrum Skagabyggðar
  Byggðarráð Húnabyggðar - 97 Sveitarstjóri fór yfir fund með heimastjórn fyrrum Skagabyggðar sem haldi var 26.02.2025. Á þeim fundi var lagt til að heimastjórnin og byggðarráð hefðu reglulega fundi ársfjórðungslega. Byggðarráð samþykkir þá tillögu og felur sveitarstjóra að kalla inn á þá fundi og að fyrsti fundur ársins verði fimmtudaginn 6. mars klukkan 15:00.
• 4.5 2301007 Húnabyggð - Sala eigna
  Byggðarráð Húnabyggðar - 97 Fyrir liggur kauptilboð í eignir sveitarfélagsins á Húnavöllum og sveitarstjóra er falið að vinna málið áfram og erindinu vísað til afgreiðslu sveitarstjórnar. Bókun fundar RH óskaði eftir fundarhléi klukkan 15:35
  Fundur hófst aftur 15:46
  EA óskaði eftir fundarhléi 15:48
  Fundur hófst aftur 16:01
  ZAL óskaði eftir fundarhléi 16:04
  Fundur hófst aftur 16:08
  
  Sveitarstjórn samþykkir að gefa tilboðsgjafa, sem lagði fram kauptilboð sem undirritað var 25.02.2025, frest til 18.03.2025 til að sýna fram á fjármögnun kaupanna sem og til að leggja fram upplýsingar um framtíðaráform fyrirhugaðrar starfsemi á Húnavöllum.
  
  Samþykkt með 8 atkvæðum en á móti var 1 (GRL)
  
  
• 4.6 2502033 Fyrirhugaðar breytingar á starfsemi og skipulagi sýslumannsembætta
  Byggðarráð Húnabyggðar - 97 Byggðarráð Húnabyggðar mótmælir harðlega frumvarpi um fækkun sýslumannsembættana úr níu í eitt sem leggja á fram á vorþingi. Byggðarráð leggur áherslu á að sjónarmið byggðarþróunar og atvinnuþróunar á landsbyggðinni vegi þungt í þeirri vinnu sem framundan er hvað þetta frumvarp varðar. Hagræðingu megi ná fram með því að flytja störf út á landsbyggðina og efla þannig bæði atvinnusköpun og byggðarþróun á landsbyggðinni. Bókun fundar GRL og ASS véku af fundi undir þessum lið.
  
  Sveitarstjórn tekur undir bókun byggðarráðs og ítrekar við stjórnvöld að fyrirhugaðar breytingar hafi hagsmuni byggða- og atvinnuþróunar á landsbyggðinni að leiðarljósi. Nýverið seldi Húnabyggð til Fasteigna ríkisins miðhæðina að Hnjúkabyggð 33 til þess að gera mögulegt að Sýslumannsembættið geti fjölgað störfum á svæðinu. Jafnframt vill sveitarstjórn vekja athygli yfirvalda á þeirri erfiðu stöðu sem upp er komin í atvinnumálum sveitarfélagsins. Sveitarstjóra falið að senda bókanir byggðarráðs og sveitarstjórnar á dóms- og forsætisráðuneytið
• 4.7 2502034 Fundargerðir 965.-969. fundar stjórnar Sambands íslenskra sveitarfélaga
  Byggðarráð Húnabyggðar - 97 Lagt fram til kynningar.

2502008F

• 5.1 2311019 Deiliskipulag gamla bæjarins og Klifamýrar
  Skipulags- og samgöngunefnd Húnabyggðar - 34 Skipulags- og samgöngunefnd þakkar Páli Líndal fyrir yfirferðina.
• 5.2 2502024 Skýrsla Skotfélagsins Markviss
  Skipulags- og samgöngunefnd Húnabyggðar - 34 Skipulags- og samgöngunefnd leggur til við sveitarstjórn að vegurinn fái nafnið Rjúpnagerði. Bókun fundar Sveitarstjórn samþykkir tillögu skipulags- og samgöngunefndar um nafngift á nýrri götu í Kleifarnámu sem hefur fengið nafnið Rjúpnagerði.
• 5.3 2502035 Áætlun eignamarka landeigna í eigu Húnabyggðar
  Skipulags- og samgöngunefnd Húnabyggðar - 34 Lagt fram til kynningar.
• 5.4 2503001 Auðkúla 3 afrétt, umsókn um afmörkun jarðar.
  Skipulags- og samgöngunefnd Húnabyggðar - 34 Skipulags- og samgöngunefnd samþykkir uppskiptingu jarðarinnar samkvæmt merkjalýsingu. Bókun fundar SÞS vék af fundi undir umræðum þessa liðar

2503001F

• 6.1 2503002 Fundur með heimastjórn fyrrum Skagabyggðar
  Byggðarráð Húnabyggðar - 98 Heimastjórn fyrrum Skagabyggðar, Erla Jónsdóttir, Bjarney Jónsdóttir, Kristján Steinar Kristjánsson, Vignir Sveinsson og Magnús Björnsson komu á fundinn og fyrir fundinum lágu fundargerðir síðasta fundar heimastjórnar og fundar heimastjórnar með sveitarstjóra.
  Nokkrar umræður voru um grjótnám á Skaga en ekki var sótt um framkvæmdaleyfi úr grjótnámunni við Kurf vegna framkvæmda við sjóvarnir. Skipulags- og byggingarfulltrúi fór yfir málið og byggðarráð felur honum að kanna til hlítar málsatvik og upplýsa byggðarráð í framhaldinu.
  Farið var yfir ýmis málefni eins og verkefni ársins, gjaldskrár o.fl. og var ný nálgun í fráveitumálum rædd sérstaklega.
  
• 6.2 2503003 Samstarfsverkefni Húnabyggðar og Skagastrandar
  Byggðarráð Húnabyggðar - 98 Fyrir fundinum lá samantekt KPMG á samningsdrögum um samstarfsverkefni Húnabyggðar og Skagastrandar. Þar kemur m.a. fram að Húnabyggð mun nú taka yfir allan rekstur Heimilisiðnaðarsafnsins, en eftir á að ákveða hvernig rekstur þess verður skipulagður í framtíðinni. Byggðarráð felur sveitarstjóra að koma á framfæri þeim umræðum og athugasemdum sem farið var yfir á fundinum með slitastjórn byggðasamlaganna.
  
  Heimastjórn fyrrum Skagabyggðar yfirgaf fundinn klukkan 16:55.
• 6.3 2503004 Samstarf Húnabyggðar og Landsvirkjunar
  Byggðarráð Húnabyggðar - 98 Þar sem samstarf Húnabyggðar og Landsvirkjunar síðasta sumar með vinnuflokka fyrir ungmenni í 10. bekk og eldri gekk mjög vel hefur verið ákveðið að halda því samstarfi áfram. Reiknað er með að einhver fjölgun sumarstarfsmanna verði milli ára.
• 6.4 2503005 Erindi frá Markaðsstofu Norðurlands
  Byggðarráð Húnabyggðar - 98 Erindinu hafnað eins og áður hefur verið gert og byggðarráð ítrekar þá skoðun sína að hlutverk Isavia er að sjá um uppbyggingu flugvalla á Íslandi og því eigi sveitarfélög ekki að leggja fjármuni í slíka uppbyggingu. Bókun fundar Sveitarstjórn vísar erindinu aftur til byggðarráðs vegna formgalla.
• 6.5 2503007 Fundagerðir fagráðs barnaverndarþjónustu Mið-Norðurlands
  Byggðarráð Húnabyggðar - 98 Lagt fram til kynningar
• 6.6 2503006 Erindi frá Sögufélaginu
  Byggðarráð Húnabyggðar - 98 Byggðarráð samþykkir að leggja Sögufélaginu til 250.000kr. í verkefni sem snýr að útgáfu bókar um sýslu- og sóknarlýsingar Húnavatnssýslu. Bókin á að koma út í haustbyrjun 2025. Bókun fundar Sveitarstjórn staðfestir afgreiðslu byggðarráðs
• 6.7 2503008 Fundargerð 970. fundar stjórnar Sambands íslenskra sveitarfélaga
  Byggðarráð Húnabyggðar - 98 Lagt fram til kynningar
• 6.8 2503009 Fundargerð 79. fundar stjórnar Samtaka sveitarfélaga á köldum svæðum
  Byggðarráð Húnabyggðar - 98 Lagt fram til kynningar
• 6.9 2503010 Lokun slátuhúss Kjarnafæði Norðlenska á Blönduósi
  Byggðarráð Húnabyggðar - 98 Byggðarráð og fulltrúar sveitarstjórnar áttu fund með Ágústi Torfa Haukssyni framkvæmdastjóra og Ingvari Má Gíslason fjármálastjóra Kjarnafæði Norðlenska (KN) fyrr í dag þar sem farið var yfir stöðuna. Ljóst er að starfsemi fyrirtækisins í núverandi mynd verður hætt og þeirri ákvörðun mun ekki verða snúið við. Það gæti tekið einhvern tíma að loka starfseminni endanlega en sú staðreynd að starfseminni verði hætt er óumflýjanleg. Forsvarsmenn KN fóru yfir þær rekstarlegu forsendur sem liggja til grundvallar þessari ákvörðun en sveitarstjórn Húnabyggðar var ekki sammála þeirri röksemdafærslu. KN staðfesti að fyrirtækið muni leggja sig fram um að gera starfsfólki sínu kleift að ráða sig til annara starfa á uppsagnafrestinum sé þess óskað eins staðfesti KN að fyrirtækið muni vinna með sveitarfélaginu að því verkefni að koma byggingum KN hér á Blönduósi í rekstur.
  Byggðarráð lýsir einnig yfir áhyggjum að bændur komi gripum sínum ekki til slátrunar á ásættanlegum tíma með tilheyrandi kostnaði og minni afkomu.
  Bókun fundar Sveitarstjórn lýsir áhyggjum sínum yfir þeirri staðreynd að Kjarnafæði Norðlenska hefur ákveðið að loka allri starfsemi sláturhússins á Blönduósi. Þetta eru slæmar fréttir og ljóst að bregðast verði við þessum fréttum eins hratt og mögulegt er. Fréttaflutningur af lokun sláturhússins hefur að mestu snúist um að sauðfjárslátrun verði hætt á Blönduósi. Stórgripaslátrun er þó ekki síður mikilvægur þáttur í starfssemi sláturhússins fyrir samfélagið hér í Húnabyggð, þar sem hún skapar ákveðinn fjölda ársverka og setur bændur á svæðinu í mikla óvissu um afsetningu stórgripa, verði henni hætt. Ekki er t.d fyrirséð hvar allur sá mikli fjöldi folalda sem koma þarf til slátrunar árlega í Húnabyggð verði afsettur á skikkanlegum sláturtíma í öðrum sláturhúsum. Því skorar sveitarstjórn á raunverulega eigendur sláturhússins að leita allra leiða til að standa fyrir stórgripaslátrun á Blönduósi áfram, annað hvort á eigin vegum eða ráðstafa húsnæðinu til annara aðila sem mögulega eru tilbúnir að halda áfram stórgripaslátrun á Blönduósi. Sveitarstjórn mun leita allra leiða til að koma á einhverskonar mótvægisaðgerðum sem mildað gætu neikvæð áhrif lokunar KN á Blönduósi. Sveitarstjórn leggur áherslu á að mörg tækifæri eru til atvinnuuppbyggingar á svæðinu og því enn full ástæða til bjartsýni. Ljóst er að allir íbúar svæðisins þurfi að standa saman og hjálpast við að snúa vörn í sókn. Sveitarstjórn mun óska eftir fundi með forsætis- og matvælaráðherra.

2303003