12.07.2022 - Sveitarstjórn Húnabyggðar

Fundargerð 2. fundar byggðaráðs lögð fram til staðfestingar á 3. fundi sveitarstjórnar eins og einstök erindi bera með sér. Liðir 1, 2, 3, 4 og 13 í fundargerðinni þarfnast sérstakrar afgreiðslu.

Vegna liðar 1 í fundargerðinni, Stefna ehf, - heimasíða Húnabyggðar, var bókað:
Afgreiðsla byggðaráðs staðfest af sveitarstjórn með 9 atkvæðum samhljóða.

Vegna liðar 2 í fundargerðinni, Námsstyrkir til framhaldsskólanema í Húnabyggð, var bókað:
Afgreiðsla byggðaráðs staðfest af sveitarstjórn með 9 atkvæðum samhljóða.

Vegna liðar 3 í fundargerðinni, Umsókn um hljóðfæranám á grunnstigi, var bókað:
Afgreiðsla byggðaráðs staðfest af sveitarstjórn með 9 atkvæðum samhljóða.

Vegna liðar 4 í fundargerðinni, Forgangsröðum framkvæmda og áherslur-tillögur til nýrrar sveitartjórnar, var bókað:
Afgreiðsla byggðaráðs staðfest af sveitarstjórn með 9 atkvæðum samhljóða.

Vegna liðar 13 í fundargerðinni, Byggðamerki, var bókað:
Afgreiðsla byggðaráðs staðfest af sveitarstjórn með 9 atkvæðum samhljóða.

Að loknum umræðum um fundargerðina var hún borin upp og staðfest af sveitarstjórn með 9 atkvæðum samhljóða.

Fundargerð 2. fundar fræðslunefndar lögð fram til staðfestingar á 3. fundi sveitarstjórnar eins og einstök erindi bera með sér. Liður 2 í fundargerðinni þarfnast sérstakrar afgreiðslu.

Vegna liðar 1 í fundargerðinni, Sameining grunnskóla, lagði Jón Gíslason fram eftirfarandi bókun:
Ég er alfarið á móti ákvörðun fræðslunefndar að bjóða foreldrum allra barna sem stundað hafa nám í Húnavallaskóla að velja um hvort börnin verði í skóla á Húnavöllum eða Blönduósi skólaárið 2022-2023. Ég tel hins vegar rétt að leita leiða til að börn á unglingastigi geti stundað nám á Blönduósi næsta skólaár. Einnig tel ég að það bréf sem skólastjóri nýs grunnskóla hefur sent í umboði fræðslunefndar til allra foreldra barna sem sótt hafa nám í Húnavallaskóla hafi verið ótímabært þar sem niðurstaða fræðslunefndar hafði ekki hlotið umfjöllun eða staðfestingu sveitarstjórnar. Í bréfinu er fullyrt að skólaakstur, mötuneytisþjónusta og heilsdagsvistun muni standa öllum nemendum til boða óháð kennslustað sem stenst ekki þar sem sveitarstjórn hafði ekki tekið afstöðu til þeirra mála eða gert ráðstafanir til að sú þjónusta geti verið í boði þegar bréfið er sent.

Elín Aradóttir óskaði eftir að hlé yrði gert á fundinum kl. 15:53.

Fundarhléi lauk kl. 16:00.

Guðmundur Haukur Jakobsson lagði fram eftirfarandi bókun fyrir hönd meirihluta sveitarstjórnar:

Meirihluti vísar staðhæfingu fulltrúa H-lista á bug varðandi að ekki hafi verið tímabært hjá skólastjóra Grunnskóla Húnabyggðar að gera könnun meðal foreldra barna sem stundað hafa nám í Húnvallaskóla. Í könnuninni voru foreldrar beðnir um að tilgreina hvar þau kjósi að börn þeirra sæki skóla á næsta skólaári. Meirihlutinn telur að til þess að sveitarstjórn sé unnt að taka ákvörðun um skólastarf næsta vetrar sé mikilvægt að allar forsendur liggi fyrir. Þá sé ótækt fyrir sveitarstjórn að taka ákvörðun um skólastarfið án samráðs við foreldra. Viðkomandi könnun hafi því ekki verið ákvörðun í skilningi 40. gr. sveitarstjórnarlaga heldur undirbúningur að slíkri ákvörðun. Meirihlutinn vill jafnframt benda á að tillaga að umræddri könnun var kynnt í framlögðu minnisblaði, sem dreift var með fundargögnum 2. fundar fræðslunefndar þann 27. júní sl. Gögnunum var dreift til allra nefndarmanna og allra sveitarstjórnarfulltrúa, þ.m.t. fulltrúa H-lista. Engar athugasemdir voru gerðar við fyrirkomulagið af hálfu fulltrúa H-lista, hvorki í sveitarstjórn né fræðslunefnd.

Jón Gíslason lagði fram eftirfarandi bókun:
Ég áskil mér rétt til að láta kanna það hvort þessi vinnubrögð samræmast eðlilegri stjórnsýslu.

Vegna liðar 2 í fundargerðinni, Ráðningarmál; Aðstoðarskólastjóri grunnskóla, var bókað:
Afgreiðsla fræðslunefndar staðfest af sveitarstjórn með 8 atkvæðum samhljóða.

Auðunn Steinn Sigurðsson vék af fundi við umræður og afgreiðslu þessa liðar fundargerðarinnar.

Að loknum umræðum um fundargerðina var hún borin upp og staðfest af sveitarstjórn með 8 atkvæðum. Einn sat hjá við afgreiðslu fundargerðarinnar (JG).

Fundargerð 1. fundar íþrótta-, tómstunda- og lýðheilsunefndar lögð fram til staðfestingar á 3. fundi sveitarstjórnar eins og einstök erindi bera með sér. Liðir 2, 3 og 5 í fundargerðinni þarfnast sérstakrar afgreiðslu.

Vegna liðar 2 í fundargerðinni, Heilsueflandi samfélag, var bókað:
Sveitarstjórn staðfestir með 9 atkvæðum samhljóða að samningur Blönduósbæjar við Landlæknisembættið um heilsueflandi samfélag gildi fyrir Húnabyggð.

Vegna liðar 3 í fundargerðinni, Félagsmiðstöð - Húsnæðismál o.fl., var bókað:
Sveitarstjórn samþykkir fyrirliggjandi áform og felur byggðaráði og sveitarstjórum að vinna málið áfram, kostnaðargreina verkefnið og leita eftir samkomulagi við eiganda hússins.

Vegna liðar 5 í fundargerðinni, Krílasport, var bókað:
Sveitarstjórn samþykkir erindið með 9 atkvæðum samhljóða.

Að loknum umræðum um fundargerðina var hún borin upp og staðfest af sveitarstjórn með 9 atkvæðum samhljóða.

Guðmundur Haukur Jakobsson, forseti sveitarstjórnar lagði fram eftirfarandi tillögur í um skipan í nefndir og ráð:

a) Byggðasamlag um Félags- og skólaþjónustu A-Hún:
Aðalmenn verði Ásdís Ýr Arnardóttir og Grímur Rúnar Lárusson.
Varamenn verði Birgir Þór Haraldsson og Erla Gunnarsdóttir

b) Byggðasamlag um Tónlistarskóla A-Hún:
Aðalmenn verði Jón Árni Magnússon og Elín Ósk Gísladóttir
Varamenn verði Arnrún Bára Finnsdóttir og Auðunn Steinn Sigurðsson

c) Búfjáreftirlits- og fjallskilanefnd A-Hún:
Aðalmaður verði Jón Árni Magnússon
Varamaður verði Sara Björk Þorsteinsdóttir

d) Gróður- og náttúruverndarnefnd A-Hún:
Aðalmaður verði Sara Björk Þorsteinsdóttir
Varamaður verði Jón Árni Magnússon

Tillögurnar bornar upp og samþykktar með 8 atkvæðum. Einn sat hjá (JG).

Erindinu frestað til næsta fundar.

Sveitarstjórn samþykkir, með 9 atkvæðum samhljóða, að verkefnið Sól í sveit færist alfarið til Textílmiðstöðvar Íslands. Er það gert í samráði við aðila sem tengjast verkefninu.

Sveitarstjórn skuldbindur sig jafnframt til að greiða þær 6.000.000 sem sveitarfélagið hefur þegar fengið greiddar vegna verkefnisins til Textílmiðstöðvar Íslands.

A)
Skipun í Heilbrigðisnefnd NV
Lögð var fram tillaga um að aðalmaður í Heilbrigðisnefnd Norðurlands vestra verði Lee Ann Maginnis.

Samþykkt með 9 atkvæðum samhljóða.

B)
Lögð var fram tillaga um að sveitarstjórn Húnabyggðar samþykki heimild til þess að greiða séreignarsparnað af launum kjörinna fulltrúa í sveitarstjórn sé þess óskað.

Samþykkt með 9 atkvæðum samhljóða.

C)
Sveitarstjórn áréttar að frítt er í sund fyrir börn og ungmenni að 18 ára aldri, öryrkja og eldri borgara með lögheimili í Húnabyggð í sundlaugina á Blönduósi.

D)
Umræður urðu um umgengni og aðstöðuhús í Ólafslundi. Sveitarstjórn felur sveitarstjórum að undirbúa flutning aðstöðuhússins á tjaldsvæðið við Húnaver. Áformað er að opna nýtt almenningssalerni að Þrístöpum.

E)
Vegna þeirrar fullyrðingar sem kom fram í bókun meirihluta sveitarstjórnar á 2. fundi hennar undir 3. lið á dagskrá, leggur Jón Gíslason fram eftirfarandi bókun.

Eins og fram kemur í því lögfræðiáliti frá lögfræðingi Sambands íslenskra sveitarfélaga, sem lagt er fram á fundinum voru Elín Aradóttir og Ásdís Ýr Arnardóttir umboðslausar til að vera viðstaddar viðtöl vegna ráðningar skólastjórnenda við nýjan grunnskóla sveitarfélagsins.

Í lögfræðiálitinu kemur fram að ný sveitarstjórn telst því ekki hafa tekið til starfa fyrr en á sínum fyrsta fundi. Fyrsti fundur nýrrar sveitarstjórnar var haldinn að liðnum 24 dögum frá kjördegi og telst því hin nýja sveitarstjórn fyrst hafa tekið við stjórn sveitarfélagsins frá þeim tíma.

Af þessum sökum tel ég að bókun meirihluta sveitarstjórnar Húnabyggðar, ranga.

Birgir Þór Haraldsson óskaði eftir því að hlé yrði gert á fundinum kl. 18:03.

Fundarhléi lauk kl. 18:19.

Guðmundur Haukur Jakobsson lagði fram eftirfarandi bókun fyrir hönd meirihluta sveitarstjórnar:

Samkvæmt ofangreindu áliti er það talið að fulltrúar meirihluta hafi ekki haft umboð til að vera viðstaddir ráðningarviðtöl skólastjóra þann 1. júní sl. Meirihluta þykir þetta miður þar sem hann taldi sig í fullu umboði.