29.06.2022 - Fræðslunefnd Húnabyggðar

Formaður lagði fram minnisblað um grunnskóla sem sent hafði verið fundarmönnum með fundarboði.
Umræður um einstaka liði minnisblaðsins.
Ákveðið að vinnuheiti nýs grunnskóla verði Grunnskóli Húnabyggðar.
Ákveðið að fyrsta forgangsmál sé að kanna hug foreldra barna sem sótt hafa nám í Húnavallaskóla til þess á hvorri starfsstöð skólans þeir vilji að börn sín sæki skóla á komandi skólaári. Áhersla verði lögð á að í könnuninni þurfi að taka skýrt fram að skólaárið 2022-2023 sé tími breytingaferlis, sem hafi það að markmiði að færa allt skólastarf á einn stað á Blönduósi haustið 2023. Jafnframt verði könnunin byggð á þeirri forsendu að foreldrum sé ljóst að full þjónusta verði boði á báðum starfstöðvum, þ.e. skólaakstur, mötuneytisþjónusta og heilsdagsvistun.
Skólastjóra ásamt Ásdísi og Magnúsi var falið að gera umrædda könnun með það að markmiði að niðurstaða verði ljós fyrir 17.júlí nk.

Þórhalla Guðbjartsdóttir, skólastjóri Grunnskóla Húnabyggðar leggur til við fræðslunefnd að Anna Margret Sigurðardóttir verði ráðin í stöðu aðstoðarskólastjóra Grunnskóla Húnabyggðar, með vísan í fyrirliggjandi minnisblað frá Hagvangi sem kom að auglýsingu og viðtölum vegna ráðningar skólastjórnenda.
Þórhalla vék af fundi 17:00

Húsnæðismál:
Formaður fræðslunefndar lagði fram minnisblaðið Leikskólar: Nauðsynlegt viðhald og endurbætur,sem sent hafði verið með fundarboði. Ásdís Ýr fór yfir minnisblaðið og gerði betur grein fyrir stöðunni.
Fræðslunefnd gerir eftirfarandi bókun:
Fræðslunefnd hvetur sveitarstjórn til að ráðast nú þegar í þau viðhalds- og úrbótaverkefni sem lýst er í framlögðu minnisblaði. Hluta verkefnanna er brýnt að ljúka áður en leikskólarnir opna eftir sumarfrí.

Leikskólarými:
Formaður gerði grein fyrir því að Sigríði B. Aadnegard, fráfarandi skólastjóra Vallabóls hafi verið falið að taka saman upplýsingar um stöðu leikskólarýma að loknu sumarfríi á Vallabóli og Barnabæ, með tilliti til eftirspurnar og mannafla. Sigríður gerði grein fyrir niðurstöðu sinni:
Á Vallabóli verða 20 nemendur í tveimur námshópum, engin börn eru á biðlista og leikskólinn fullmannaður. Möguleiki væri að bæta við 3 nemendum miðað við núverandi stöðu. Húsnæði gæti rúmað 8-10 börn til viðbótar með mjög lítilsháttar breytingum, en ráða þyrfti fleiri kennara.
Á Barnabæ verða um 60 nemendur, á 5 deildum þar af eru 10 börn á biðlista fyrir aðlögun, en gert er ráð fyrir að hún hefjist í byrjun september. Húsrými leikskólans, að teknu tilliti til deildaskiptingar er nægjanlegt en ljóst er að leikskólinn verður ekki fullmannaður eftir sumarfrí, þar sem margir starfsmenn sem sinna sumarafleysingum hafa ekki aldur til að vinna ýmis mikilvæg verk og fastráðnir starfsmenn hafa ekki allir lokið sínu sumarfríi.

Fræðslunefnd gerir eftirfarandi bókun:
Fræðslunefnd telur það algjört forgangsmál að fjölga starfsmönnum á Barnabæ. Fræðslunefnd skorar á sveitarstjórn að fela sveitarstjórum að leita leiða nú þegar svo hægt verði að fjölga starfsmönnum strax að sumarfríi loknu svo ekki skapist neyðarástand.

Fræðslunefnd þakkar Sigríði fyrir góða samantekt á stöðu leikskólamála.

Fyrir fundinum liggur minnisblað sem sýnir samanburð á gjaldskrám leikskólanna.

Fræðslunefnd gerir eftirfarandi bókun:
Ljóst er að talsverður munur er á gjaldskrám leikskólanna. Fræðslunefnd beinir því til sveitarstjórnar að hefja vinnu við endurskoðun gjaldskrár.

Lögð voru fram á fundinum drög að nýrri auglýsingu vegna stöðu leikskólastjóra og aðstoðarleikskólastjóra, samkvæmt ákvörðun á 2. fundi sveitarstjórnar Húnabyggðar. Sveitarstjórum falið að birta auglýsingu í næstu viku.

Ekkert bókað undir þessum lið.