Dagana 27.-29. ágúst, föstudag til sunnudags n.k verður opið hús í TextílLabinu að Þverbraut 1 á Blönduósi. Á staðnum eru geislaskeri, vínyl prentari, útsaumsvél, nálaþæfingarvél og stafrænn vefstóll. Smiðjustjóri mun aðstoða við notkun á smiðjunni. Aðgengi er frítt, en greitt fyrir það efni sem notað er.
Einnig verður haldin ,,pop-up" sýning listamanna í Ós Textíllistamiðstöð laugardag og sunnudag kl. 11:00-18:00. Vefarar, litarar, prjónarar og sjónlistamenn frá Kanada, Bandaríkjunum, Hollandi, Chile og Ítalíu bjóða öllum að koma og skoða listaverkin sem eru innblásin af íslensku umhverfi, menningu og sögu. Þau verða til sýnis í húsnæði Textílmiðstöðvarinnar í Kvennaskólanum að Árbraut 31 og Textíllabinu að Þverbraut 1. Boðið verður upp á veitingar á sunnudaginn frá kl. 16:00-18:00.
Verkefnið ,,Þráhyggja" verður kynnt á sama tíma. Það fjallar um að lengja líftíma textíls og endurnýtingu með þekktum íslenskum aðferðum, unnið af hönnuðunum Sólveigu Hansdóttur og Berglindi Ósk Hlynsdóttur. Verkefnið er styrkt af Nýsköpunarsjóði námsmanna og unnið í samstarfi við Textílmiðstöð Íslands og Listaháskóla Íslands.
Á laugardag og sunnudag verða síðan haldin þriggja tíma námskeið "Wool Interactions/ullarsmaskipti" (sama námskeið kennt tvisvar sinnum) undir leiðsögn Zoe Romano. Námskeiðin fara fram á ensku. Sjá nánari kynningu og skráningu á heimasíðu Textílmiðstöðvarinnar hér.
Vinsamlegast athugið að gestir verða að bóka tíma í Opið hús í TextilLab og "Wool Interactions". Það er hægt á heimasíðu Textílmiðstövarinnar hér.