Aðgerðastjórn almannavarna í héraði vill vekja athygli á slæmri veðurspá fyrir kvöldið í kvöld, mánudaginn 21. febrúar, og aðfaranótt þriðjudags. Rauðar og appelsínugular veðurviðvarandir eru fyrir gervallt landið.
Aðgerðastjórn vinnur að því að virkja hina ýmsu viðbragðsaðila af þessu tilefni, t.d. björgunarsveitir. Þá hafa sveitarstjórar umdæmisins m.a. verið upplýstir um stöðu mála.
Af þessu tilefni leggur aðgerðastjórn áherslu á eftirfarandi:
- Búast má við samgöngutruflunum og að vegir muni lokast og/eða verði lokað, einkum til fjalla. Af því tilefni er fólk varað við því að vera á ferðinni í kvöld, í nótt og fram eftir degi á morgun, bæði vegna veðurs og slæmrar færðar sem skapast getur.
- Þá má búast við asahláku á láglendi og er fólk sérstaklega beðið um að gæta að niðurföllum.
- Búast má við rafmagnstruflunum og þurfa íbúar að búa sig undir það.
- Íbúar eru beðnir um að ganga vel frá öllum lausum munum sem geta fokið.
- Bændur eru hvattir til þess að huga að skepnum sínum sem dvelja úti.
- Skólastjórnendur eru hvattir til þess að fylgjast með og vera undir það búnir að aflýsa skólahaldi á morgun.
- Ábyrgðarmenn hafnarmannvirkja og eigendur báta eru beðnir um að gera allar mögulegar ráðstafanir til þess að koma í veg fyrir tjón á bátum og mannvirkjum, t.d. með því að tryggja að bátar losni ekki frá landfestum.
Íbúar eru hvattir til þess að halda sig heima og fylgjast vel með framvindu veðurs o.fl., bæði í fjölmiðlum og samfélagsmiðlum.
Hér er hægt að fylgjast með framvindu veðursins á vef Veðurstofu Íslands: https://www.vedur.is/vidvaranir
Hér er hægt að fylgast með vegum og lokunum hjá Vegagerðinni: http://www.vegagerdin.is/.../faer.../allt-landid-faerd-kort/
Hér er hægt að fylgjast með ölduhæð á vef Vegagerðarinnar: https://www.sjolag.is/