Krístín Ingibjörg Lárusdóttir hefur verið ráðin í nýtt starf hjá Blönduósbæ sem auglýst hefur verið að undanförnu en það er starf Menningar-, íþrótta og tómstundafulltrúa Blönduósbæjar.
Kristín starfar nú sem launafulltrúi á skrifstofu Blönduósbæjar og mun sinna því starfi þar til nýr launafulltrúi hefur verið ráðinn en hún mun formlega taka við hinu nýja starfi um næstu áramót.
Blönduósbær ákvað um mitt ár að auglýsa hina nýju stöðu og leggja niður frá sama tíma starf Forstöðumanns æskulýðsmiðstöðvar, sem mun falla undir hið nýja starf, ásamt þróunarvinnu með starfsemi félagsmiðstöðvarinnar Skjólsins og einnig áform um að þróað verði á næstu árum nýtt Frístundaheimili Blönduósbæjar. Þá mun starfið einnig verða tengiliður við embætti Landlæknis og umsjónaraðili með verkefninu,,Heilsueflandi samfélag” sem sótt hefur verið um, en einnig vera tengiliður sveitarfélagsins við öll félög og samtök sem eru með skipulagða íþrótta- og tómstundastarfsemi í sveitarfélaginu sem og alla menningartengda viðburði sem sveitarfélagið kemur að.
Kristín Ingibjörg hefur yfirgripsmikla þekkingu og reynslu á öllum þeim þáttum sem starfið nær til og þekkir vel til allra innviða í sveitarfélaginu og á starfssvæðinu. Þá hefur hún einnig menntun og reynslu sem nýtist í þessu nýja og fjölbreytta starfi sem miklar væntingar eru bundnar við.
Blönduósbær fagnar því að búið sé að ráða í hið nýja starf og bíður Kristínu Ingibjörgu velkomna til starfa á nýjum vettvangi hjá sveitarfélaginu.
Með góðum kveðjum,
Valdimar O Hermannsson
Sveitarstjóri